المساعد الشخصي الرقمي

مشاهدة النسخة كاملة : عشان تبقى شاطرةفى حياتك الزوجية......تعالى اقرى


Adele
18-08-2016, 07:12 PM
بسم الله الرحمن الرحيم
بصي يابطه منك ليها انا عايزاكوا كدة تقروا بتمعن الكلام الحلو ده وبعدين هنتناقش فى كل تفاصيله بس بجد كلام يتوزن بالذهب.......الفرق بين الزوجة الشاطرة ... والزوجة اللى فاكرة نفسها شاطرة !! .............. (والاتنين فى نفس المستوى فى كل شئ)

1- شهر العسل ....
الزوجة الشاطرة :- أنا ماباعرفش أطبخ خالص يابيبى .. .ولا أسلق بيض حتى .... احنا شهر العسل كل يوم نخرج ناكل بره ....
زوجها :- ولا يهمك يا حياتى ... كل يوم نخرج ناكل بره ... وبعد شهر العسل نبعت نجيب ديليفرى وأطبخ معاك كمان يا قمر ....
(علميا ... هى بت lower his expectations .... فأى مجهود حتعمله فى الطبيخ بعد كده حيسعد بيه ... ده غير أنها بتعمل فاونديشن واضح لعلاقتها بالمطبخ فى ذهن الزوج .... فبتلحقه وهو فى الهابى phase بتاعة شهر العسل اللى بيتقبل فيها أى حاجة وعلى قلبه زى العسل)
.......
الزوجة اللى فاكرة نفسها شاطرة (يوم الصباحية وحماتها موجودة) :- لا لا الا الطبيخ ... انا باعرف أعمل كل حاجة ... طب ايه رأيك أنى باعرف أدبح الطيور وأشيل راشها وأطبخها من الألف الى الياء ؟؟؟
حماتها سمعتها (وقبلت التحدى) فنزلت جابتلها ديكين رومى وخلتها تدبحهم وتطبخهم !!
(بتحكيلى أنها يوم الصباحية كله وقفته فى المطبخ وسامعاهم قاعدين يتكلموا ويضحكوا بره وماندمت على شئ ندمها على اسراعها فى الكلام وتباهيها بشطارتها فى الطبيخ ... وكانت هذه هى بداية مأساتها !! .... تحكيها لى وهى حزينة بعد مرور حوالى خمسة عشر عاما على هذه الواقعة والقصة حقيقية !!)
(علميا ... الهبلة turned on روح التحدى عند حماتها ... ده غير أنها علت أوى ال expectations بتاعة جوزها ... ولن يقبل منها الا مجهود 100% وأستذة فى المطبخ .. .والا تبقى بتهمل ومابتحبوش ومش عايزه تبذل مجهود) !!

2- المكواة ....
الزوجة الشاطرة :- يا روحى أنا ماباعرفش أكوى خالص !! وأخر مرة كويت حرقت ايدى وصباعى وقعدت بعديها عيانة فى السرير يابيبى ... يرضيك يحصل لى كده ؟؟ ... وكمان المكوجى مابياخدش كتير وده رزقه ... خد حبيبى قمصانك معاك وانت نازل وعدهم كام واحد وقل له مايجيبهمش غير وانت موجود عشان تتأكد أنه بعتهم صح ...
زوجها :- تكوى ايه لا !! انتى بتهزرى ؟؟ ... هاتى أنزلهم للمكوجى صدقة عننا !!
........
الزوجة اللى فاكرة نفسها شاطرة :- مكوجى ايه يا روحى ؟؟ هات انا اكويهم .. هو أنا يعنى ماباعرفش أكوى ؟؟ .... ونودى القمصان وممكن قميص يتوه وللا حاجة ... واهو نوفر الفلوس طالما عندنا مكواة !!
زوجها :- خلاص اللى يريحك ....
( بعد ولادتها قيصرى للمرة التانية بقت تودى القمصان عند المكوجى ... وجوزها شايل فى نفسه وحاسس أنها بقت بتتتنك ومش عايزه تشتغل فى البيت ويبدأ ينفخ ويفتعل المشاكل وفى مرة فى خناقة يقوم قايل لها :- ده حتى القمصان مابقيتيش تكويها وانا ساكت وصابر !!)

3- الزوجة الشاطرة ... من أول أسبوع فى الجواز اتفقت مع شغالة تجيلها مرتين فى الأسبوع .... حماتها طبعا استغربت وسألت جوزها :- وهى ماتنضفش ليه ؟؟ .. .قال لها يا ماما كتر خيرها أوى طبيخ وغسيل مواعين !! حتشيل ازاى هى سجاجيد ولا تشيل ستاير ولا تقلب مراتب ... ده أنا نفسى ماقدرش أعمل كده !!
الزوجة اللى فاكرة نفسها شاطرة :- لا لا أنا مش حدخل واحدة بيتى أبدا وحعمل كل حاجة بنفسى والله لو حموت نفسى ده بيتى مملكتى ... ومافيش حد حيعمل اللى أنا حعمله !!
(مش محتاجة أكتب اللى حصل .... المتزوجات عارفين)
4- الزوجة الشاطرة :- حبيبى أنا محتاجة عربية !! حتى لو عربية صغيرة .. .بس أنا مش حقدر أركب مواصلات خالص ولا حتى أمشى فى الشارع ... أنا باتبهدل أوى !!
الزوج ساعتها ممكن يعصلج شوية .... تقوم هى مدياهمله وتعمل عصيان مدنى سلمى وتتعوج العوجة ... فينزل يجيب العربية ..
.......
الزوجة اللى فاكرة نفسها شاطرة ... تعمل ملحمة التضحية ... ويبقى جوزها راكب عربية محترمة وهى بتتشعبط فى الميكروباصات وتحط القرش فوق القرش ... ولما تنزل تشترى الخضار تروح السوق وتستغلى الطماطم أم تلاتة جنيه ... وتقعد تمشى على رجلها فى الحر والزحمة عشان تلاقى طماطم ب اتنين جنيه ونص ... وفى الآخر ترجع البيت تلاقى جوزها بيقول لها :- أنا غيرت الموبيل وجبت أى فون .. .ايه رأيك فى المفاجأة دى ؟؟ ... فهى تفرح وتقول فى نفسها (الحمدلله ... شوفتى بقى تدبيرك جه بفايدة ازاى ؟؟) .....
5- الزوجة الشاطرة .... بعد كام سنة لما جوزها يبقى معاه فلوس أو تجيله فلوس تطلب منه يغيرلها العربية وتجيب حاجة أحسن ... حتى عشان الأولاد ...
.........
الزوجة اللى فاكرة نفسها شاطرة .... بعد كام سنة لما جوزها يبقى معاه فلوس أو تجيله فلوس يروح يغير عربيته ويجيب لنفسه حاجة محترمة ... وهى لسه بتتشعبط فى الميكروباصات ... ولو طلبت – بعد فيييييييييييين - منه عربية (وكانت واكلة حبوب شجاعة) :- انتى محتاجة العربية فى ايه ؟؟ ... ماحنا عندنا عربية أهه وعربيتى هى عربيتك .... وهى تبتسم !! ........ ...
(don"t blame others for cheaping you if you cheaped your self)

6- الزوجة الشاطرة .... (من أول سنة) وقبل العيد بحاجة بسيطة ... تبدأ تمهد له بخصوص هديتها وترمى كلام أن بنت خالتها جوزها بيجيبلها مش عارفة ايه دهب ... وبنت عمتها جوزها بيوديها تتفسح فين ... والكلام ليكى واسمعى يا جاره ... وجوزها طبعا بيفهم الرسالة وبيهيئ نفسه ...
.............
الزوجة اللى فاكرة نفسها شاطرة .... تتحنط جنب عشرين تلاتين عيد .... لحد ماتعفن وريحتها تطلع .... فاكرة أن جوزها من نفسه حينزل يشتريلها هدية !! .... لا لا ... ويزيد الطين بلة كمان لما جوزها بعد خمستاشر سنة جواز يفتكر أنه تقريبا ماجبلهاش هدية بالمعنى المفهوم ويقول لها :- تحبى أجيبلك ايه ؟؟ ... تقول له :- أنت أغلى هدية عندى ...
جود فور يو الصراحة !!

7- الزوجة الشاطرة ..... على فكرة أنا مش قادرة على مشاوير العيال لوحدى !! أنا مش حقدر أخرج غير مشوارين فى الأسبوع وأنت حتعمل بقية المشاوير معاهم ... أنا تعبانة مش قادرة !!
(علميا ... بتوثق الرابطة ما بين الأولاد وأبوهم .... بتشغل جوزها فيما ينفع .... بتحسسه بالمسئولية كأب ودى حاجة بتسعده .... تطبق المثل القائل ان لم تشغلى جوزك فى الحق ... شغل نفسه بالباطل)
.........
الزوجة اللى فاكرة نفسها شاطرة ..... تعمل هى كل المشاوير .... وتعيش ملحمة الشمعة التى تحترق .... وجوزها يرجع من الشغل يأنتخ على الكنبة ....
(علميا .... تزيد قناعته الشخصية أن دوره أنه يشتغل بس ويجيب فلوس ويبقى كتر خيره ... بتقلل احساسه بالمسئولية كأب ... يبقى عنده وقت فراغ فيبدأ يفكر فى حاجات مؤذية له هو شخصيا قبل ما تكون مؤذية ليها)

8- الزوجة الشاطرة من أول شهر فى الزواج...... جوزها :- يللا ياحبيبتى نروح لماما .... هى :- حبيبى مانا كنت لسه عندها الأسبوع اللى فات !! يا بيبى أنا باتكسف لما باروح ... كفاية أوى أروح معاك مرة اول كل شهر ... انت روح زى مانتا عايز .... وخلينى انا أروح معاك كفاية مرة فى الشهر يابخت من زار وخفف .... وللا عايزنى كل أسبوع أقول لك تعالى معايا لماما انت كمان ؟؟
المهم بعد نقاشات ولأن الدنيا لسه فى الأول بيقتنع ويسكت وبياخد على الوضع من الاول .....
(عملت حدود ... قللت من مرات التصادم والاحتكاك ... جعلت زيارتها غالية .... يابخت من زار وخفف)

الزوجة اللى فاكرة نفسها شاطرة ..... كل ما يقول يللا هى هوب يللا ... وفى كل مرة تروح ... تسمع كلمة من هنا على ضحكة من هنا على بصة من هنا على غمزة من هنا ... وتفضل ساكتة وشايلة شايلة شايلة شايلة .... لحد ما هوب ... .فى مرة تنفجر وتقول له أنا مش حعتب بيت أهلك تانى !!
(لم تضع حدودا .. .فكانت النتيجة ... الاستباحة !! .... وكانت نتيجة الاستباحة .. .الانفجار الكبير .... الذى سيعقبه بالتأكيد رد فعل من الزوج ....وكل ده عشان كانت فاكرة نفسها شاطرة)

9- الزوجة الشاطرة .... مانسيتش نفسها ولا مستقبلها وكملت دراستها ... ويمكن خدت اجازة من شغلها فى وقت صغر الأولاد العصيب ورجعته تانى .... جوزها فخور بيها وإن أظهر غير ذلك ....
الزوجة اللى فاكرة نفسها شاطرة .... اهملت نفسها تماما ونسيت نفسها بحجة بيتى وأولادى (الكلام المحفوظ) ... وظلت فى مكانها ... وزوجها يتقدم ويتقدم ... حتى يأتى وقت ينقطع فيه الحوار بينهما بسبب أنه قاعد دلوقتى فى الدور ال24 .... وهى لسه فى الدور التانى !!

10- الزوجة الشاطرة .... حتبتسم وهى بتقرا الكلام ده ... وعشان تبعد الحسد عن نفسها ... حتدخل تقول لا يا مروة مش للدرجة دى ... وتقوم قايلة حديث على آية قرآنية واهم حاجة البيت والعيال وربنا يخليلى جوزى يارب(وتعمل له مينشن)
الزوجة اللى فاكرة نفسها شاطرة .... حتدخل تكتب ... كان فين الكلام ده من زمان ؟؟ ... انا لله وانا اليه راجعون ... انضحك علينا واتغشينا باسم الدين ونصائح الأهل اللى ضيعتنا ... ولم ندرك الحقيقة الا مؤخرا ... ولا نستطيع حتى أن نتفوه باى شئ .. .والا تهمنا فى ديننا وأخلاقنا ....

عزيزتى الشاطرة ... بجد أنا عايزه أعرف ... انتى ازاى من أول يوم كنتى شاطرة كده !! مين علمك ؟؟ من فهمك ؟؟ جبتى الخبرة دى منين ؟؟ ... طب والدك ووالدتك ربوكى ازاى ؟؟ ... أرجوكى لو مكسوفة تكتبى عالوول ابعتيلى انبوكس وعرفينى من أين لك هذا الجمال وهذه الحكمة ؟؟

فالحكمة ضالة المؤمن ... انى وجدها فهو أحق بها ....
منقوووووله

لحياتى معنى
18-08-2016, 07:16 PM
كنتى فين يا لالالالالالالالالالالالا لما قلت الاهههههههههههههههه

Adele
18-08-2016, 07:21 PM
كنتى فين يا لالالالالالالالالالالالا لما قلت الاهههههههههههههههه

مين سمعك يابطة كلنا لها بس اهو ننصح الجيل الصاعد عشان ميعملش زينا

لحياتى معنى
18-08-2016, 07:36 PM
ننصح مين دول حيموتوا على الجواز اصلا" وتقولك اجرب اشمعنى انتوا



مين سمعك يابطة كلنا لها بس اهو ننصح الجيل الصاعد عشان ميعملش زينا

Adele
18-08-2016, 08:04 PM
ننصح مين دول حيموتوا على الجواز اصلا" وتقولك اجرب اشمعنى انتوا



خليهم يجربوا بس يسمعوا شويه النصايح دى صدقينى بتجيب نتايج هايلة...sm3

ام نفيسه
18-08-2016, 08:09 PM
ههههههههه موضوع تحفه
المشكله ليه بيحصل كده في حد بيتعمل بصدق نيته

شمس للأبد
18-08-2016, 08:31 PM
الزوجة اللى فاكرة نفسها شاطرة .... حتدخل تكتب ... كان فين الكلام ده من زمان ؟؟ ... انا لله وانا اليه راجعون ... انضحك علينا واتغشينا باسم الدين ونصائح الأهل اللى ضيعتنا ... ولم ندرك الحقيقة الا مؤخرا ... ولا نستطيع حتى أن نتفوه باى شئ .. .والا تهمنا فى ديننا وأخلاقنا ....



كلنا هذا الرجل أعاااااااااااااااا

Adele
20-08-2016, 09:35 PM
ههههههههه موضوع تحفه
المشكله ليه بيحصل كده في حد بيتعمل بصدق نيته

مافيش تعارض بين حسن النية وأنها تحافظ على نفسهاsm9

Adele
20-08-2016, 09:41 PM
الزوجة اللى فاكرة نفسها شاطرة .... حتدخل تكتب ... كان فين الكلام ده من زمان ؟؟ ... انا لله وانا اليه راجعون ... انضحك علينا واتغشينا باسم الدين ونصائح الأهل اللى ضيعتنا ... ولم ندرك الحقيقة الا مؤخرا ... ولا نستطيع حتى أن نتفوه باى شئ .. .والا تهمنا فى ديننا وأخلاقنا ....



كلنا هذا الرجل أعاااااااااااااااا
والله يا حبيبتى مافيش تعارض بين النصايح والدين والأخلاق المشكله كانت فى إللى بعض الااهالى نصحونا بيه للأسف ...بس على فكرة انا بقالى 14سنة جواز ويحاول أصلح ما افسدة الدهر والحمد لله بشوف بعض النتائج ....فممكن تلحقى نفسك ما تقلقيش..ربنا معاكى وانا تحت أمرك.يا قمرsm4

Adele
20-08-2016, 10:00 PM
زعلتونى حورياتى الحلوييييييييين هو موضوعى مش اعجبكم ولا اييييييييييييهs3

شمس للأبد
20-08-2016, 10:28 PM
والله يا حبيبتى مافيش تعارض بين النصايح والدين والأخلاق المشكله كانت فى إللى بعض الااهالى نصحونا بيه للأسف ...بس على فكرة انا بقالى 14سنة جواز ويحاول أصلح ما افسدة الدهر والحمد لله بشوف بعض النتائج ....فممكن تلحقى نفسك ما تقلقيش..ربنا معاكى وانا تحت أمرك.يا قمرsm4

انا بقى بقالي 7 سنين جواز بس
بس اكتشفت الخدعة اللي اتعملت فينا بدري و لحقت نفسي و كانت النتيجة ان اهلي طبعا قالوا اني اتغيرت بعد الجواز و قلبوا عليا
علشان مخلية بيتي و جوزي و عيالي هما رقم 1 و مركزة فيهم اكتر من اي حاجة تانية
و بقيت زي اللي انشق عن الجماعة بالزبط s2s2

Adele
21-08-2016, 01:07 AM
انا بقى بقالي 7 سنين جواز بس
بس اكتشفت الخدعة اللي اتعملت فينا بدري و لحقت نفسي و كانت النتيجة ان اهلي طبعا قالوا اني اتغيرت بعد الجواز و قلبوا عليا
علشان مخلية بيتي و جوزي و عيالي هما رقم 1 و مركزة فيهم اكتر من اي حاجة تانية
و بقيت زي اللي انشق عن الجماعة بالزبط s2s2
سيبك منهم انت ربنا يخليلك زوجك وأولادك يباركلك فى بيتك ...طالما مافيش قطع صلة رحم يبقى انت كدة تمام ....بس خدى متى نصيحه خلى زوجك يحس ان وراكى حاجات تانية ليكن هوايات ليكن أصحاب يعنى من الاخر مش بتاعة البيت وبس لا ليكى اهتمامات خاصة ولازم يحترمها ..تتغاضى شغلنا طول الوقت ويحس انك ليك عالم خاص بيك ودة بيجذب الرجل...وربنا يعينك

شمس للأبد
21-08-2016, 02:30 PM
سيبك منهم انت ربنا يخليلك زوجك وأولادك يباركلك فى بيتك ...طالما مافيش قطع صلة رحم يبقى انت كدة تمام ....بس خدى متى نصيحه خلى زوجك يحس ان وراكى حاجات تانية ليكن هوايات ليكن أصحاب يعنى من الاخر مش بتاعة البيت وبس لا ليكى اهتمامات خاصة ولازم يحترمها ..تتغاضى شغلنا طول الوقت ويحس انك ليك عالم خاص بيك ودة بيجذب الرجل...وربنا يعينك

بالنسبة لاهلي
ماهو ده اللي انا ماشية بيه معاهم
بغيب اغيب و اتصل اطمن عليهم
مع انهم مش بيرفعوا عليا السماعة ابدا مهما كانوا عيالي تعابنين ولا انا اللي تعبانة
بس ولاااااااااااا يهمنيs2
بالنسبة لجوزي و العيال بقى
فالحمدلله ربنا قدرني اني افك شوية من الساقية اللي كنت مربوطة فيها
حتى نفسية العيال اتحسنت و طبعا انا كمان
كفاية اني بخف الضغط النفسي بالهوايات اللي بحبها
ربنا يعيننا كلنا و يهدي سرنا يارب s4s4

بطوطه ام توته
21-08-2016, 11:47 PM
موضوعك حلو اوى فعلا وانا شخصيا اتعلمت حاجات بس متاخر كتييييييييير لكن كل حاجه كويسه عملتها احتسبتها عند ربنا وهو يجازينى بيها خير
بس على فكرة الرجاله فى موضوع الاكل بالذات ميعرفوش الهزار يعنى ممكن فى شهر العسل والعواطف الجياشه يوافق بأى حاجه لكن بعد كده الوضع بيتغير وممكن يقلب على مراته قلبه سودا بعيد عنك وخدى بالك كلام شهر العسل مدهووووووووووووون بزبده وبعد الشهر ده بيبانوا على حقيقتهم s3s3s3s3

Adele
22-08-2016, 08:54 AM
موضوعك حلو اوى فعلا وانا شخصيا اتعلمت حاجات بس متاخر كتييييييييير لكن كل حاجه كويسه عملتها احتسبتها عند ربنا وهو يجازينى بيها خير
بس على فكرة الرجاله فى موضوع الاكل بالذات ميعرفوش الهزار يعنى ممكن فى شهر العسل والعواطف الجياشه يوافق بأى حاجه لكن بعد كده الوضع بيتغير وممكن يقلب على مراته قلبه سودا بعيد عنك وخدى بالك كلام شهر العسل مدهووووووووووووون بزبده وبعد الشهر ده بيبانوا على حقيقتهم s3s3s3s3
لا ركزى انت مش واخدة بالك هى هتطبخ وكل حاجه وعارفه تعمل اكل وممكن تبقى لهلوبه واستاذة بس هى تدى مقدمات عشان اى حاجه هتعملها بعد كدة هتبقى ياسلام واو جميلة دى اجتهدت وتعبت نفسها....انما هى لو داخله من الاول ام العريف وتوتو عضلات مش بعيد مايبقاش فى شهر عسل اساسا وصدقينى الموضوع ده عن تجربه...اهااااااااااs3

Adele
22-08-2016, 09:02 AM
بالنسبة لاهلي
ماهو ده اللي انا ماشية بيه معاهم
بغيب اغيب و اتصل اطمن عليهم
مع انهم مش بيرفعوا عليا السماعة ابدا مهما كانوا عيالي تعابنين ولا انا اللي تعبانة
بس ولاااااااااااا يهمنيs2
بالنسبة لجوزي و العيال بقى
فالحمدلله ربنا قدرني اني افك شوية من الساقية اللي كنت مربوطة فيها
حتى نفسية العيال اتحسنت و طبعا انا كمان
كفاية اني بخف الضغط النفسي بالهوايات اللي بحبها
ربنا يعيننا كلنا و يهدي سرنا يارب s4s4
ربنا يباركلك شموسه فى بيتك وزوجك واولادك.....ويجعلنا صحبة صالحه ويعنا على دنيانا ويجعلنا نافعين لبعض ولو حتى بالفضفضه.دى لوحدها راحه ربنا يسعد ايامك...s4

شمس للأبد
22-08-2016, 03:16 PM
ربنا يباركلك شموسه فى بيتك وزوجك واولادك.....ويجعلنا صحبة صالحه ويعنا على دنيانا ويجعلنا نافعين لبعض ولو حتى بالفضفضه.دى لوحدها راحه ربنا يسعد ايامك...s4

s4s4s4s4s4

المشتاقه للجنه
28-08-2016, 02:05 AM
بارك الله فيك حبيبتى

onji
07-09-2016, 08:55 AM
اولا انا قيمت لك ممتاز
ثانيا جزاكي الله خيرا حبيبتي عشان عرفتيني حقيقتي
انا مش شاطره انا كنت فاكره نفسي شاطره
لحد ما وقعت عينيا علي موضوعك اللي فيه الحقيقه المؤلمه
ثالثا و دا الاهم ان من نصحنا غلط و هما اهلنا الوالد الله يرحمه و و الوالده ربنا يحفظها و يهديها و تبطل تقول حماتك هي مامتك لازم تحطيها في عيونك و تخدميها و تراعيها و لو ضايقتك بأي كلمه استحمليها لانها غالبا متقصدش و جوزك و فري له كل سبل الهدوء و الراحه و اوعي تزعليه الراجل بيحب الست العاقله و اللي تعتمد على نفسها و تمشي البيت باللي يديهولها متشيليهوش الهم خليكي انتي راحته عندك و كلام كتييير من دا
و يقولولك عصر الدلع انتهي و انتي دلوقتي لازم تكوني اد المسؤليه
علميا نصحونا غلط
نظريا لم نعيش حياتنا و لم نستمتع بها علاوه علي البهدلة بسبب النصائح المضلله
ننصح بقي الجيل الصاعد عشان متكررش المأساه

جنتي بقلبي
24-09-2016, 05:42 AM
حلوة النصايح دي
الواحد متجوز بقاله 4 سنين
لسه فيه فرصه ؟ هههههه