المساعد الشخصي الرقمي

مشاهدة النسخة كاملة : من بداية جوازك ......


الهمة العالية 90
05-12-2016, 10:31 AM
من بداية جوازك .. عودي نفسك وعودي جوزك على شوية حاجات كدة ، هي بسيطة بس حقيقي بتفرق جامد .. ❤❤
- ادي أهمية للحظة استقباله كل يوم وهو راجع من الشغل .. يعني الطبيعي كل يوم أول ما يدخل من البيت أقل حاجة يلاقيكِ بتجري عليه وفرحانة إنه جه ..
ياريت كمان لو المظهر يكون حلو بحيث يسعد قلبه أول ما يشوفه .. وما تأڨوريش علشان الموضوع ميكونش تقيل عليكِ .. يعني كفاية بس يبقى العادي بتاعك إنك مثلاً قبل ميعاد وصوله بربع ساعة تروحي تلبسي حاجة سريعة وتسريحة شعر خفيفة وميكب بسيط "وممكن بدون ميكب " ، المهم في الآخر عاوزين نوصل لنقطة إنه أول ما يشوفك ينسى همومه وكل التعب اللي شافه في شغله ..
وصدقيني لو اديتي بس للموضوع أهميته .. هتلاقيه يستاهل ، ومش صعب زي ما إنتِ متخيلة " حتى لو عملتيه كل يوم "
- حاولي تفهميه .. لازم تفهميه .. ماينفعش تعيشي معاه من غير ما تفهميه ..
يعني إيه ؟!
يعني لازم أبقى مدركة إن دماغ الراجل غير دماغي .. وإن فيه حاجات هو ممكن يشوفها مهمة جداً ويعمل عليها مشكلة .. وأنا أبقى شايفاها مش مستاهلة أصلاً ..
فمطلوب مني من بداية الجواز خالص أقعد معاه وأسأله عن احتياجاته كراجل ، إيه الحاجات اللي لو عملتها إنتَ كدة هتحبتي وهتكون راضي عني ..
إنتِ ممكن جداً تكوني مش فاهمة أوي طبيعة الرجل .. وممكن معلوماتك تكون غلط .. فمش هتلاقي أحسن منه يقولك هو محتاج منك إيه علشان يبقى سعيد وحياتكم مستقرة إلى حد كبير ❤❤
- الطبيعي إن المرتب يكفيكم لحد آخر الشهر .. اعملوا أي حاجة المهم يكفي !
أوبشن إن المرتب يخلص في نص الشهر ده بسبب استهلاكات " إضافية " وبعدين أقوله المرتب خلص اتصرف .. ده ماينفعش .. وهيخلي بيتكم مليان مشاكل وضغوطات على حاجة مش مستاهلة ..
طيب نعمل إيه ؟
هنبدأ من يوم القبض نطلع فلوس الإيجار والمية والنور والنت ولو فيه أطفال يبقى البامبرز وخلافه على جنب .. ونبدأ نقسم الباقي على 30 يوم " ده لو احنا مبنعرفش خالص نسيطر على نفسنا " وهيبقى كل يوم عندنا مبلغ معين نحاول منزيدش عنه .. بالعكس ، نحاول نقلل علشان لو جه ظروف مرض أو عزومة أو كدة
وصية مهمة للستات .. الله يكرمكم راعوا الحتة دي جداً لإن الشباب في بلدنا طالع عينه ومفيش مقابل !!
ولو هيصتوا شوية في أول الشهر وصرفتوا كتير .. يبقى ندوس على نفسنا في الآخر وندخّل نفسنا في تحدي إننا نكمل لآخر الشهر بدون ما نستلف من حد حاجة .. ولو العملية باظت كام مرة مش مشكلة ، المهم بس ميكونش ده العادي بتاعنا ❤❤
- خلي العادي بتاعك إنك كل فترة كدة تعملي مفاجئة مختلفة .. وبسيطة برضو بس لزوم التغيير ..
يعني مرة يدخل الشقة يلاقيها كلها بلالين سواء ع الأرض أو في السقف .. مرة تعملي بوكس مليان رسايل منك وياخد واحدة كل يوم وهو نازل ع الشغل " الرسايل بتاخد فترة للتجهيز ، بس الموضوع يستاهل " .. مرة تبعتيله رسالة على الموبايل تعبريله فيها عن مشاعرك ، وبلاش تطلبي منه في آخرها يجيب طماطم معاه ..
هتلاقي أفكار كتير بس فكري .. وجددي نيتك
علشان لما تفرحي جوزك بإذن الله ربنا يرضى عنك .. جوزك .. وهتلاقيكِ إنتِ تلقائي مبسوطة بالتغيير ده .. وهتلاقي إنعكاس الحاجات دي على بيتك وهدوءه
- ماتحكيش حاجة بتحصل جوا بيتك لحد " بلاش فضايح "
هتبقى حاجة حلوة جداً إنكم تتخانقوا وتبطلوا تكلموا بعض شوية .. وبعدين تقعدوا مع بعض تتكلموا بعقل وتحاولوا توصلوا لحل وسط مع بعض من غير عند
علشان لو الناس عرفت .. كل واحد بيقول من وجهة نظرة وبيحكم بمزاجه وهو أصلاً محضرش المشكلة وغالباً بيسمع من طرف واحد .. فالدنيا بتولع ..
بعدها الزوجين بيتصالحوا .. بس الناس بتفضل لسنين تتكلم عليهم وعلى المشكلة بتاعتهم .. وبصراحة مش متخيلة ممكن إزاي حد يستحمل يسمح لحد إنه يتدخل في أدق أدق التفاصيل اللي بتحصل في بيته بالشكل ده .. لأ وكمان يقعد يطلع ده غلطان وده مش غلطان وهو مسمعش إلا من طرف واحد !
#فيه_حالات ممكن ساعتها نسمح بالتدخل من الناس .. بس ده في المشاكل الكبيرة جداً .. مش في أي حاجة وخلاص
" وَإِنْ خِفْتُمْ شِقَاقَ بَيْنِهِمَا فَابْعَثُوا حَكَمًا مِنْ أَهْلِهِ وَحَكَمًا مِنْ أَهْلِهَا إِنْ يُرِيدَا إِصْلَاحًا يُوَفِّقِ اللَّهُ بَيْنَهُمَا ۗ إِنَّ اللَّهَ كَانَ عَلِيمًا خَبِيرًا "
حد عقلاني من أهله ومن أهلها .. يكونوا فعلاً عاوزين يحلوا المشكلة وعندهم حكمة وذكاء .. مش أي حد وخلاص ❤
- صاحبي جوزك .. وحاولي تكوني أقرب واحدة ليه في الدنيا .. اسعي إنك تكوني السكن بتاعه وتكوني أول إنسانة بييجي لها ويفضفض معاها لما يكون عنده مشكلة ..
حاولي تكوني مريحة .. وعقلك كبير .. وماتتخانقيش على الحاجة قبل ما تسمعي وجهة نظرة ، يمكن لما تسمعيها تهدي وتعرفي إن الموضوع مش مستاهل
- حاربي علشان بيتك ينجح .. واعملي كل اللي تقدري عليه الأول قبل ما تفكري في الطلاق .. الطلاق مش سهل وماينفعش يكون لبانة في بوقنا ومع كل مشكلة نقول طلقني !!

مش يمكن يكون الغلط منك إنتِ ؟ أو منكم انتوا الاتنين وانتِ عاوزاه هو بس يتغير مع إنك مفكرتيش تتغيري ؟
- الأحلام اللي بترسموها لنفسكم عن الجواز وبتتصدموا بعدها بالواقع بتكون نتيجة إنكم عاوزين تاخدوا وبس ..
هي عاوزة الشاب اللي رومانسي علطول وبيجيب هدايا ويخرجها ويحن عليها ويساعدها في شغل البيت ..
مع إنها عمرها ما فكرت هي هتعمل إيه علشان هو يعمل كدة ؟
يعني فين الدافع اللي هيخليه يعمل كدة ؟ ماهو لازم إنتِ كمان تحاربي علشان تسعديه ، فهو في المقابل يحارب علشان يسعدك
وعلى الجانب الآخر .. إنتَ عاوزها علطول مهتمة بنفسها .. كلامها حلو وبيتها نضيف وعلطول بتضحك وشايلة المسئولية !
هي مش هتعرف تعمل ده كله إلا لما تلاقي مقابل منك ..
لازم على الأقل خالص تقدر تعبها وتغرقها حنان .. الحنان ده هو أكتر حاجة ممكن تساعدها إنها تكمل .. وأي ست في الدنيا محتاجاه حتى لو مش بتبين .. فمتبخلش عليها ❤❤
وفي النهاية ❤
احنا بنعمل كل ده علشان ربنا .. يعني لو ملقيتش تقدير في الأول من شريك حياتي هكمل برضو وربنا بإذنه هيبارك لي في زوجي / زوجتي ويبعث الفرحة والسكينة والراحة على بيتنا
الحاجات اللي فوق دي كل ما تتعمل في أول الجواز هيكون أفضل .. علشان هتبقى حياتهم بدايتها صح و هيبقى ده الطبيعي بتاعهم
اللي اتجوز خلاص يبدأ من دلوقتي .. ويتوقع إنه ممكن يلاقي تعجب أو تريقة من شريك حياته " وده طبيعي" لإنه مش متعود على كدة .. بس بعدها هيتعود وهيشوف قدام عينه انعكاسات الحاجات دي على علاقته بزوجته أو زوجها ❤
الجواز مش مخيف يا جماعة .. ومش مثالي وكله حب وأحلام ..
الجواز فيه الحب والفرحة وإنك تبقى حاسس إنك في عالم تاني .. وفيه المشاكل والضغوطات والمسئوليات ..
إنتَ بس اللي بايدك تقلل من حاجة علشان تكتر التانية .. ولازم تبذل مجهود وتعرف دورك كويس في المشروع اللي إنتَ داخله ده علشان ينجح ❤❤
وربنا يسعدكم جميعاً
#ويبقي_الحب

ملكة بيتى
05-12-2016, 11:45 AM
موضوعك جميل والله عندك حق ف كل كلمة ربنا يسعدك
ممتاز ياجميل

هالة عيسوى
06-12-2016, 04:39 AM
موضوع رائع حبيبتى
تسلم ايدك
ممتااااااااز

المشتاقه للجنه
11-01-2017, 08:21 AM
http://7or3en.com/up/do.php?imgf=147440306937531.gif

ساجده حتى الممات
11-01-2017, 10:41 AM
http://7or3en.com/up/do.php?imgf=147440290180118.gif

sena loly
11-01-2017, 11:17 AM
http://7or3en.com/up/do.php?imgf=148412112716894.gif

نور العيون ♥
11-01-2017, 05:54 PM
http://7or3en.com/up/do.php?imgf=147440290167854.gif

Super Girl
12-01-2017, 01:45 AM
http://7or3en.com/up/do.php?imgf=147440290180118.gif

حكاية بنت
12-01-2017, 12:27 PM
مشكووووووورة ياقمر

sweet red roses
23-01-2017, 05:01 PM
http://7or3en.com/up/do.php?imgf=147440306937531.gif